O liderado desempeña un papel relevante na creación de contornas de traballo saudables e na promoción do benestar das persoas traballadoras. Nun contexto laboral cada vez máis dinámico e esixente, a forma en que se dirixen e acompañan os equipos pode influír en aspectos como a comunicación, a confianza, a colaboración e a xestión dos conflitos, así como na prevención dos riscos psicosociais.

No marco da Semana Europea para a Seguridade e a Saúde no Traballo, o Issga, en colaboración con MC Mutual, organiza este webinar sobre liderado saudable, no que se abordará o papel das persoas que exercen funcións de liderado na xeración de seguridade psicolóxica nos equipos. Este concepto fai referencia á creación dun clima no que as persoas poidan expresar ideas, preguntas, preocupacións ou erros sen temor a ser ridiculizadas, castigadas ou excluídas, favorecendo a confianza e a participación.

Durante a sesión analizarase como un liderado consciente, empático e adaptativo pode contribuír a crear contornas de traballo emocionalmente seguros e saudables. Abordaranse aspectos relacionados coa comunicación aberta, a escoita activa, o recoñecemento das contribucións, a xestión e normalización do erro como oportunidade de aprendizaxe, a corresponsabilidade e o establecemento de límites claros e respectuosos.

Tamén se prestará especial atención á relación entre liderado e prevención de riscos psicosociais, analizando como as actuacións de quen lidera os equipos poden contribuír a mellorar as relacións interpersoais, xestionar os conflitos e favorecer o benestar emocional das persoas traballadoras.

O webinar terá un enfoque práctico e participativo. A través de exemplos, dinámicas e outros recursos, facilitaranse ferramentas e orientacións que poidan trasladarse ao día a día dos equipos e das organizacións, co obxectivo de favorecer unha cultura baseada na confianza, o respecto e a colaboración.

A actividade está dirixida a técnicos e técnicas de prevención de riscos laborais, responsables de seguridade e saúde laboral, empresarios, empresarias e persoal directivo, mandos intermedios, delegados e delegadas de prevención e outras persoas con responsabilidades de xestión ou coordinación de equipos, así como a profesionais interesados na promoción de contornas de traballo saudables.

Con esta actividade, o Issga, en colaboración con MC Mutual, contribúe á difusión de coñecementos e ferramentas orientadas a integrar o benestar das persoas na xestión das organizacións e a promover estilos de liderado que favorezan unhas condicións de traballo seguras e saudables.

Inscrición

Para asistir a este evento debes rexistrarte usando o formulario que aparece debaixo. Unha vez introducidos os teus datos recibirás un e-mail coa confirmación.

Uns días antes da celebración do evento recibirás un novo e-mail coa ligazón desde a cal poderás seguir o evento por video-streaming.

Importante: Revisa na túa conta de correo non desexado  ou spam por se non recibes o correo de confirmación ou a ligazón á videoconferencia.
Ante calquera dúbida podes contactar con nós no e-mail: rexistros@issgaeventos.com