Estratexias fronte ao malestar emocional

Nun contexto laboral caracterizado pola súa alta esixencia e ritmo acelerado, a saúde mental dos traballadores converteuse nun aspecto fundamental para garantir o benestar integral e a produtividade nos entornos laborais. A xornada que presentamos, en colaboración con FREMAP, está deseñada para abordar de xeito integral e preventivo os aspectos relacionados coa saúde emocional, promovendo a sensibilización, a detección temperá e a xestión adecuada dos trastornos mentais e os problemas emocionais que poden afectar a calquera individuo no seu día a día.

Este programa encádrase dentro das accións contempladas no Plan de Actuacións para 2025 do ISSGA, que inclúe diversas iniciativas orientadas á promoción da saúde no traballo. Estas accións buscan fomentar entornos laborais saudables, reducir o estigma asociado aos trastornos mentais e facilitar o acceso a recursos de apoio psicolóxico e emocional para os empregados.

Durante a xornada, abordaranse conceptos clave como a diferenza entre malestar emocional transitorio e trastornos mentais clínicamente diagnosticables, como a depresión maior ou os trastornos de ansiedade. Explicarase como estes trastornos poden manifestarse no contexto laboral, afectando a concentración, a motivación, as relacións interpersoais e, en última instancia, a produtividade; e enfatizarase a importancia da detección precoz e da intervención temperá, incluíndo estratexias de psicoeducación, técnicas de afrontamento e a necesidade dun enfoque multidisciplinar que involucre profesionais da saúde mental, como psicólogos clínicos e psiquiatras.
Fomentarase a sensibilización sobre a importancia da escoita activa, a empatía e a creación dun entorno laboral que facilite a comunicación aberta e o apoio mutuo.

A finalidade é que os asistentes poidan identificar signos de alarma, comprender a relevancia da intervención temperá e adoptar medidas que contribúan a manter un equilibrio emocional saudable.

En definitiva, esta xornada busca consolidar un enfoque preventivo e proactivo na xestión da saúde mental no traballo que contribúa a reducir o impacto dos trastornos mentais na vida laboral e persoal dos individuos.